الأربعاء 20 أبريل 2022 05:08 صباحاً - قامت المطربة الشابة زيزي عادل بالإعلان عن اعتزالها الفن بشكل نهائي، وذلك حتى تستطيع أن تتقرب إلى الله سبحانه وتعالي، وأكدت أنها أخذت هذا القرار منذ فترة كبيرة، حتى تبعد تماماً عن جميع مغريات الحياة.

اعتزال زيزي عادل الغناء

وتحدثت المطربة زيزي عادل من خلال فيديو نشرته من خلال حسابها الشخصي على موقع التواصل الاجتماعي الخاص بنشر الصور والفيديوهات “انستجرام“، وقالت “قررت أسيب مهنة الغناء، والقرار أنا مخدتهوش امبارح.. أنا واخداه من فترة كبيرة جدا، بس يمكن مطلعتش قلت وقتها لأني كنت حابة أتكلم مع نفسي ومع الناس القريبة أوي”.

زيزي عادل تؤكد أن المقربين منها شجعوها على القرار

وتابعت زيزي قائلة “الناس القريبة مني عارفين نفسهم، ولما قلتلهم على القرار شجعوني ودعموني كمان، ويمكن قرار الاعتزال ده بيبعدني عن أكتر مغريات الحياة وهي الشهرة والأضواء”.

واستكملت قائلة “أنا عاوزة أقول كمان الفن هو مصدر دخلي ورزقي، وأنا بسيب حاجة بعيش منها وسبتها وعارفة أن ربنا هيرزقني، وأنا راضية جدا عن قراري ومبسوطة جدا بيه وحابة اللي جاي جدا، وحاسة إن حياتي اختلفت تمامًا”.

زيزي تتحدث عن رفضها كل العروض المغرية

وأشار الفنانة قائلاً “يمكن لما أخدت القرار تعرضت لمواقف واللي تسمى اختبار من ربنا، وكان اختبار صعب والإنسان ضعيف، لأن جالي عرض مجاليش وأنا بمارس مهنة الغناء، لكن الحمد لله ربنا كرمنا وقدرت أرفض من دعم من ناس حواليا”.

وأنهت حديثها قائلة “أنا حابة أموت وربنا راضي عني، ويمكن دي حاجة كلنا بنتمناها، فأنا مش عارفة هموت أمتي لكن كل اللي عوزاه أكون مستعدة لمقابلة ربنا، وأقابله وأنا راضية عن نفسي وحياتي وأفعالي، والحمد لله ربنا كرمني والتزمت، وربنا يكرم ألتزم أكتر وادعولي أن ربنا يثبتني على اللي أنا فيه”.